Tag Archives: pag-ibig

Ibig Kong Ika’y Payapa (Salin ng Me Gustas Cuando Callas / I Like For You To Be Still ni Pablo Neruda)

Ibig kong ika’y payapa, na parang halos isang puwang,
At nauulinigan mo lang ako sa kalayuan at hindi ka makalabit ng aking tinig,
At tila ang iyong mga mata’y pumailanlang,
At pawang sinelyahan ng halik ang iyong mga labi.

Kung paanong ang lahat ng bagay ay puspos ng aking diwa
Umuusbong ka mula sa lahat ng ito, puspos ng diwa ko.
Panaginip na paru-paro, kagayak ka ng aking kaluluwa
At kahawig ng salitang panglaw.

Ibig kong ika’y walang imik, na para bang kay layo mo,
Parang nananaghoy, mariposang tumatangis.
At nabobosesan mo ako mula sa kalayuan at hindi ka naaabot ng aking tinig:
Papasukin mo ako’t patuluyin sa iyong katahimikan

Dinggin mo ko sa iyong pagtahimik, mangusap tayong walang imik
Singlinaw ng sinag, singpayak ng singsing.
Tulad ka ng gabi, tahimik at binalangkas ng mga tala.
Ang hinahon mo’y buhat sa mga bituin, humahayo’t maaliwalas.

Ibig kong ika’y walang imik, na para bang hindi kita kapiling.
Malayo’t may kirot, na para bang ika’y namayapa.
Mangusap ka, kahit isang ngiti ay sasapat
At ako’y liligaya, maliligayahan sapagkat ito’y hindi ganap.

 

Isinalin ni Anj Heruela, Abril 2016

 

Advertisements
Tagged , , , , , , , , , , , ,

365 for 2012: (63) Pagpupunla

Kung paano hinahagod ng patak

ng bagong-panganak na hamog

ang tuktok upang tuntunin ang dulo;

mariin, ninanamnam ang bawat

damping nag-iiwan ng bakas;

bago tuluyang maubos

pagdating sa ugat,

 

mamarkahan ko ang daraanan

ng mga halik na kasingnipis ng silahis

ng unang sikat ng araw

sa pagbuka ng langit.

 

Saka ako sasanib sa putik.

Makikiisa sa pinagmumulan, kaibuturan

ng mga lihim ng pamumulaklak, pagbunga,

pagkalanta. Doon ako magtatago.

Yayakap ang katawan ko, basang-basa,

sa bukal ng iyong pag-usbong.

         Punong-puno ng pangako,

         kumakayat sa pananatili. Naghihintay. 
 

Hanggang sa muling sunduin ng bukang-liwayway.

 

Lalapat sa kalupkop, sasalubong sa umaga.

Hinog at buo, muli tayong magtatagpo.

Pagbitak ng araw, doon tayo magkikita.

                                                Doon tayo magkikita.

                                                                  Doon tayo magkikita.

Tagged , , , , , ,

365 for 2012: (62) Pag-inog ng Mundo

While listening to Ada Tayao‘s blues-y melody for ‘Lambat at Sagwan’ a song we wrote about fishermen, fishing, and sun movements, these verses came to me, sort of forcing itself into the music.

Such cheesy cerebral flatulence. It’s actually not even cerebral, but oh well. Carry on. 

 

Sumisikat na ang araw, dahan-dahan

Gumagapang ang liwanag sa ating paanan

Sa lilim ng kumot, oras ay ating tinakasan

Sa bisig ng isa’t-isa’y hinanap ang kalawakan

 

Humiram tayo ng kaunting sandali

sa mga bulalakaw na nagmamadali

At bago tuluyang bumagsak at maglaho

Dito sa bagong-tuklas nating langit tayo magtago

 

Tamnan mo ng mga halik ang buo kong katawan

At aani tayo ng tamis na kailanma’y ‘di tatabang

Sa kuyom ng palad ko, ang puso mo ay ipinid

Pag-ibig natin ang susi sa pag-inog ng daigdig

 

Paano bang natangay ako ng mga titig mo

At heto na tayo, bumabaybay ng bagong uniberso

Matutunton ba nila kung saan tayo papunta?

Hangga’t hindi pa, ipanatag muna ang pangamba

 

Ngunit  sa pagtirik ng araw sa tuktok ng kanyang trono,

Tanghaling tapat ang huhudyat sa ating prumeno

Saka mo tutuntunin ang daangtalang sinumpaan

Saka ko titiyaking hindi ako nakaharang sa inyong daan

 

Tamnan mo ng mga halik ang mga pisnging binasa ng luha

Mangarap na lang na may uusbong pang bulaklak

Sa kuyom ng mga palad natin ay ating ikukubli

Bakas ng pag-ibig na hindi maaaring manatili

 

Nagtanim ako ng mga halik sa lupang hindi ko maangkin

Sa bawat dampi ay inilibing ko ang mga lihim natin

Ang ating langit ay kinanlong ng walang-katiyakan

Alikabok na lang ng mga bulalakaw na naglaho ang naiwan

 

September 5, 2012, Pagadian  

Tagged , , , , , , , , , ,